Geschichte

Gschicht vo de Güllärugger

Im Joor 1970 het sich e Gruppe jungi Prattler im Chäller vo Dalchers zwecks Gründig vo enere Fasnachtsclique troffe. Es sidas dr Dalcher Reto, dr Schneider Kurt, dr Schaefer Kari (Gogel), dr Frank Erich, dr Strübin Heini und der Ullman Roland gsi. Mir hei is noch lange Diskussione uf e Name Güllärugger geinigt. Do s Sackgäld sällmol no spärlich gsi isch, hei mir keini Larve chönne chaufe, mir hei se no sälber gmacht. D Waggisbluse si vom Strübin Heini sinere Tante gnäiht worde und die wysse Hose hei mir in der Rhybrugg gkauft. Ebeso d Perügge. Der Wage isch mit Strauhballe vo Gogels dekoriert worde. Konfetti hei mir is nonig chönne leiste, bim Milchhüsli aber hei mir chönne Spreuer bstelle. Das isch sälli Zyt no e Alternative gsi. 1971 het der Dalcher Jacki (Selig) Schnitzelbänk für eus gschribe, wo mir denn am Sunntig zobe in de Beize gsunge hei. Dä finanzielli Zuestupf hei mir denn für die nächsti Fasnacht chönne bruche. Die sälber gmachte Larve hei no mindestens drei Joor müesse häre halte. Natürlich immer mit andere Perügge. Wo mir denn in d Lehrgange si, het sich au s Budget gänderet und mir hei chönne vo Spreuer uf Räppli umstige.

Heini Strübin

D Güllärugger hei im Verlauf vo de Joohr verschiedeni Mitglieder gha. Ich due mi uf die konzentriere, wo aktiv gsi si, wo ich und der Pipo im 1993 hei agfange Fasnacht mache. Es si das d Rezia, d Lisa, dr Sepp (selig), dr Obmaa Schnelli Willy und der Schofför Gerd gsi. Im Verlauf vo de Joor hets verschideni Wächsel geh. So het d Lisa in Liestel im 1995 afo Fasnacht mache, derfür isch d Irma cho. Der Schofför Gerd het au im 1995 ufghört und isch vom René ersetzt worde. Wo denn im 2012 d Rezia und dr Willy ufghört hei, isch der Mathederzue gstosse. Im 2016 het au d Irma (selig) mit Fasnacht ufghört. Und der Mathe het für e Joohr usgsetzt. Do si mer mit em Schofför no 4 gsi. Mir hei denn reagiert und im 2017 als Gescht drei Häxe, ( d Corinne, s Ruthli und d Sabrina) uf e Wage gno. S letscht Joor hei mir se als Güllärugger ufgno. Ebeso het der MathiasWüthrich euse Mentigschoffeur der Thomi Weisschopf abglöst. Au dr Mathe het wiedermitgmacht und so si mir ab em Jubiläumsjoohr acht Güllärugger uf em Wage.

Der Obmaa Ernst